قبل بداية العام الجديد بأيام قليلة
كلنا اتمنينا ان اللي محققنهوش في السنين اللي فات
يتحقق السنادي او على الاقل حلم من احلامنا الكتيره يتحقق ..
وانها تكون سنة سعاده وفرح علينا اجمعين ,, ..
وفي وسط كم من الامنيات والاحلام
وناس فرحانه بقدوم عام جديد في بدايتة وفي اعياد عند البعض مننا
او ضحكة بتتمنى تدوم ولو لدقايق أو ساعات بس !
تحصل كارثه !!
نسمع انا وانت وهو وهي في شريط الاخبار وعلى بعض من المواقع الالكترونية
خبر .. إنفخار ضخم امام " ...... "
ايوان متعمده مكتبش العنوان بالكامل
علشان العنوان دا هايتكرر في مناطق وبأوقات مختلفه في الايام الجايه !
الخبر عند البعض جايز يكون عادي ماهو بيحصل في اي بلد ايه الجديد يعني؟
ناس ماتت ؟
جامع او كنيسه كانوا على وشك يتمحوا من على الارض ؟
فتنه بتحيا من جديد بس المرادي اقوى من
مشكله تافهه تحصل بين اهل بيت مسلم وبيت مسيحي ؟؟
ما كل دا بيحصل في اي دوله
بس الجديد هنا انه حصل في " مصــر "
لما الاقي كتير من اصدقائي بيكلموني بعد الحادث بأيام .. انهم خايفين من البلد !!
- خايفين من ايه ؟
- خايفين من بعضنا !
خايفين تيجي لحظه ونتهاجم لمجرد رمز بيتعرف منه
انت مسلم ولا مسيحي !
انتي بحجاب تبقي مسلمه
وانت مرسوم على يدك صليب تبقى مسيحي
والاتنين ياخدوا حقهم من بعض !
وتقوم مجزره وفوضى بينا
انا مش ببالغ في كلامي ولا بهول من الامر
لما في وقت اللي حصل نتظاهر ..
المسلمين يرفعوا بأعلى صوتهم " الله اكبر "
والمسحيين بالتضاد معاهم " يحيا الصليب "
!!!!
دا يتسمى ايه؟؟
اومال فين الوحده اللي بيتحاكوا بيها في كل وسائل الاعلام ؟!
ولا هي موجوده بس مع اصحابنا وجيرانا ؟؟
..
اللي حصل دا مهواش من مسلم ولا هو من مسيحي
عايش في البلد دي وبيعشق ترابها
ناس الله اعلم مين بيقودها
عازمين على خراب البلد دي واقوى سلاح في الدنيا دي
يخرب ويجيب اي بلد الارض
هي .. ( الفتنة )
بلدي بقت مستهدفه وبتنهار قصاد عيني
وانا وانت بنساعد على دفنها !
..
محتاجين نتغير .. ايوا
لاننا للأسف اتغيرنا للأسوء
بس انا هاتغير ازاي وحقي ضاع وبيضيع مع الايام !
هو مش المفروض يتحاسب ويتحاكم كل مسئول عن آمن البلد دي
بعد الحادث اللي حصل ؟
ولا هي ارواح الناس دي بقيت رخيصه اوي كدا ؟؟
احنا مش محتاجين كلام يهدي نفوسنا
ويصلح اللي اتكسر لانه مكسور من زمان !
ولا محتاجين سيدي الرئيس مع كامل احترامي لك
إنك تهون علينا مصيبتنا
سيدي .. امتى هتواجه مشاكلنا من غير كلام خطب
معروف وبيتقال بنفس الصيغ مع اختلاف المناسبه او المصيبه؟!
امتى هاتحسس الشعب دا انه له كرامه وعزة نفس ماتقلش عن اي شعب
تاني متقدم جدير بالاحترام
وتحقق كلامك " إن كرامة المصريين من كرامة مصر ولا تهاون مع من يسيء لأبنائها "
امتى هاتحسننا بالأمان ؟
لما بقينا خايفين من بعضنا ونخون ديننا !
دي كبيره يا ريس .. كبيره اوووووووي
امتى هاتحسسنا اننا بني آدمين لينا حق نعيش
في البلد دي ومنهجرهاش
صحيح مدخلتناش في حروب خارجيه طوال فترة رئاستك
بس انت السبب في صنع حروب داخل البلد
وكان ولابد ارفض واشجب واصرخ وبرده كلمتي مايبقلهاش صوت وصدى !
ولحد امتى يا ريس هاتمنى لبلدي الافضل من غير تغيير ؟؟
..
انا ماسفرتش وشوفت بلاد كتير عشان اقارن بلدي باي بلد شوفتها
اكيد في الاحلى والاجمل منها بكتييير
بس انا مابحبش البلد دي وبس
لا انا بعشقها وحبي وحنيني لها مايتوصفش بكلام
لكن انا خايفه لا يقل انتمائي لها يوم عن التاني ..
وافقد احترامي لها
ووقتها محدش يلومني زي ما لاموا كتير هجروها !
~~~~~~
ملحوظه ..
في اصدقاء ليا حاطين على صورة اكونتاتهم عالفيس بوك صورة الهلال والصليب ..
ناس تانيه هاجمتهم وقالتهم ان الصور دي حرام !
عايزه اقول بس كلمه للناس التانيه دي..
ياريت من فضلكم نرتقي بتفكيرنا شويتن تلاته ونبطل سطحية
مش عيب ولا حرام لما اواسي واهون على اصحابي بكلمه او رمز
مش لا قدر الله هافقد ديانتي علشان بهون بكلمه او شعار نتحد بيه مع بعض
في مصيبه زي دي بينا
ومن الاولى نبص لحجم المشكله مش لتوافه الأمور !
:: :: ::
مش قاصده اضايق حد فيكم واللي وانا واحدة منكم
بس اكيد كلنا مغمومين
لكن كنت حابه افضفض معاكم واقول رأيي بعد اللي حصل
واللي لسه هايحصل .. !!