دارت الكاميرا مع كلمة اكشن وبدأ تصوير المشهد و بمجرد ما التصوير خلص فاجىء احمد السقا فريق العمل و سجد مع انتهاء تصوير أول مشهد ليه في الفيلم، وفسر البعض ان السجدة دى شكر لله على رجوع تصوير الفيلم بعد ما وقف لفترة طويلة.
و كان فيه تفسير تانى وهو ان السجدة دى شكر لله على نعمة حب الناس اللى لاحظها مع بداية التصوير، و اتقال كمان ان السبب ممكن يكون مرور أول ذكرى لوفاة والده المخرج صلاح السقا اللى اتعلم على ايديه فن التمثيل وكان متعلق بيه لدرجة كبيرة.
من ناحية تانية رفض السقا الكشف عن سر السجدة دى وأكد أنها حاجة خاصة بينه وبين ربنا، وأنه عملها بتلقائية ، و اتمنى فى نفس الوقت أن الفيلم يخرج للنور و يقدر يلحق موسم عيد الأضحى أو يتعرض في إجازة نص السنة.
بيشاركه في بطولة "المصلحة" النجم أحمد عز والفنانة حنان ترك وزينة والفنان السوري عابد فهد وكندة علوش وأحمد منير وصلاح عبد الله ونهال عنبر وعمرو يوسف وأحمد السعدنى وياسمين رئيس، ومن تأليف وإنتاج وائل عبد الله، وإخراج ساندرا نشأت.