اللى بينتحل شخصيتى على الفيسبوك تافه

نفى الفنان المصري خالد صالح أن يكون ليه حساب على تويتر والفيسبوك. وقال إن كل اللى على الحسابات من آراء سياسية، ملوش علاقة بيه ، لكنه في نفس الوقت اكد ان الثورة المصرية لسه مكملتش، ومفيش حاجة اتحققت ، و وصف صالح اللى بينتحل شخصيته، بأنه “تافه”.وقال “بالتأكيد، لو كتب الكلام ده أو قاله بشخصيته الحقيقية ؛ محدش كان هيسمعه ، عشان كده بيحاول يقول الكلام على لساني أو لسان زملائي؛ عشان يكتسب المصداقية”. وضاف “الثورة لسه محققتش اهدافها ، واحنا لسه على الطريق ليها. ولازم الناس تكون مصحصحة؛ عشان نقدر نحقق اللى مات فى سبيله الشهداء”.

من ناحية تانية صالح عمل زيارة لموقع تصوير فيلم "حلمى عزيز" و بارك لفريق العمل و عمرو عرفة و احمد عز .....و هيبدأ تصوير فيلمه الجديد "فبراير الاسود" اللى من تأليف واخراج محمد امين و من انتاج الشركة العربية للسينما .وكمان بيستعد اليومين دول لتصوير دوره في مسلسل "9 شارع جامعة الدول" المقرر عرضه خلال شهر رمضان اللي جاي .

ومن ناحية تانية كمان واضح ان الأوضاع الاقتصادية السيئة اللي بتحصل في مصر في الفترة الاخيرة ساهمت لحد كبير في التأثير بشكل سلبي علي المجال الفني وكانت سبب رئيسي في ان خالد صالح يلجأ لفكرة انه يأخد قرض من بنك من البنولك اللبنانية الموجودة في مصر عشان يشتري عربية جديدة شيروكي 4x4 وده اللي اتحقق فعلا واخد خالد قرض قيمته 170 ألف جنيه بيسددها علي 5 سنين، في الوقت اللي كان سدد الـ 50 % الباقية من قيمة السيارة كاش .. الغريب أن صالح عمل الخطوة دي رغم اشتراكه في بطولة عملين كبيرين السنة دي وهما مسلسل "الريان" وفيلم "كف القمر" واخد خلالهم أجر كبير بيفوق تمن السيارة..